恭喜各位心想事成，身體健康。

昨晚打完麻雀返屋企，未沖涼就俾老公捉住同我玩......咗個遊戲。佢揾嘢矇住我對眼，叫我張大口(心諗睇佢攪邊科)，然後餵我食咗一口“杰杰”哋又甜甜哋嘅嘢，叫我估甜品一種，(哦！原來咁咋) ，我估咗好多次都估唔中，足足食晒一大碗後，決定投降唔玩。最後開估，完來係............“芝蔴糊”。

佢都犀利咯，學㕑短短一兩個月，㕑藝已經出神入化，可以將啲芝蔴整到完全無晒芝蔴味，害得我今日諗咗成日，都諗唔到佢點整。不過下次我就醒“爬”，如果佢俾啲有芝蔴味嘅糊仔我食，我就一定唔會估係“”芝蔴糊”。老公，你騙不到我的。

........“欽敬”“欽敬” ！

上星期返瑜伽班第一堂，有個穿上鮮粉紅色運動衫的肥女子同班，佢前面啲豬腩肉將胸前個公仔print攪到變晒形，十分“搶鏡”。

到放學時，佢面露不悅之色同Miss講：「你教啲咁簡單動作，同我早前喺佛?（聽唔清楚）班學啲嘢有七成似喎！」Miss即時語塞，不知如何招架。

我心想，你個肥女子上第一堂就咁“牙斬斬”，遲啲你就知。皆因瑜伽呢樣嘢睇嚟好似好悠閑平靜，其實真係有苦自己知。等我放長雙眼睇你點。

上帝賜給每人一隻長叉和一隻長匙羹用作吃東西之用。


地獄裡，每個人都因為被其他人之長叉匙阻擾，而顯得面目猙獰， 煩躁不堪，各人都想盡方法將食物放入自己口中。

 反觀天堂裡，氣氛祥和，寧靜舒暢， 因每個人都用自己之叉匙把食物送到他人口中。


 你會選擇嗎？？

昨日買咗支國旗俾可愛嘅姨甥仔，想起在報張上一個關於愛國的故事，內容經本人删改如下：


話說一天，土人捉咗一個美國鬼、一個㗎仔同埋一個中國人，土人要考吓佢哋嘅智慧，俾佢哋揀一樣嘢墊住打屁股，邊個有腦就放邊個。

美國鬼“懶實”叻咁即刻揀咗個cushion，點知俾個土人打爆cushion之餘，再打爆個屁股；㗎仔見狀，就搶住用晒剩下嗰啲cushion墊住，結 果cushion打爆幾個，屁股就一啲事都無。個㗎仔仲陰陰笑咁望住中國人，個心想「睇你點死」。中國人低頭想咗一陣，就同個土人講，cushion都無 晒，惟有用個㗎仔墊住嚟打啦。

寫呢個故事嘅人，愛國之餘，仲反映咗埋藏喺佢內心嘅仇恨。


不其然都覺得受佢影響，唔係點會用「鬼」同「㗎仔」呀！